लेवान्डोस्कीको बार्सिलोना जाने इच्छा | Hamro Khelkud

एजेन्सी – जर्मन च्याम्पियन बायर्न म्युनिखका फरवार्ड रोबर्ट लेवान्डोस्कीले क्याटलान क्लब बार्सिलोना जाने इच्छा व्यक्त गरेका छन् ।

बायर्नमा २०२२/२३ सिजनको अन्त्यसम्मका लागि सम्झौता रहेका लेवान्डोस्कीले सम्झौता नविकरण नगर्ने क्लबलाई प्रष्ट पारेका छन् । बायर्नले पनि अर्को सिजन सित्तैमा छोड्नुभन्दा यसै सिजन उनलाई अन्यत्र बेच्नेबारे सोच बनाएको छ । लेवान्डोस्कीले आफ्नो सम्झौताको आर्थिक पाटोमा कुनै समस्या नरहेको र नयाँ चुनौतीका लागि सम्झौता नविकरण नगरेको बताएका छन् ।

स्काई जर्मनीका अनुसार लेवान्डोस्कीले क्लबलाई आफू बार्सिलोना जान इच्छुक रहेको पनि बताएका छन् । गत महिना मात्र बायर्नका कार्यकारी प्रमुख ओलिभर कानले लेवान्डोस्कीले क्लब नछाड्ने बताएका थिए । तर उनले बताए अनुसार दुई पक्षबीच नयाँ सम्झौता हुन नसक्दा लेवान्डोस्कीले क्लब छाड्ने अवस्था आएको हो ।

सन् २०१४ मा बोरुसिया डर्टमुन्ड छाडेर बायर्न म्युनिख आएका पोलिस फरवार्डले सबै सिजन लिग उपाधि जिते । यसक्रममा उनले क्लबका लागि ३ सय ४३ गोल गरेका छन् । ३३ वर्षीय लेवान्डोस्कीले यसक्रममा तीन पटक जर्मन कपको उपाधि जित्नुका साथै पछिल्लो पाँच सिजन नै सर्वाधिक गोलकर्ताको उपाधि जित्न सफल भए ।

यता बार्सिलोना पनि विश्व स्तरीय फरवार्डको खोजीमा रहेको छ । लिओनेल मेस्सीको प्रस्थान र सर्जियो अगुएरो संन्यास लिन पुग्दा क्लबको आक्रमण केहि कमजोर भएको छ । क्लबले युवा खेलाडी भन्दापनि हाललाई प्रदर्शन गर्न सक्ने अनुभवी फरवार्ड खोजिरहेको छ । लेवान्डोस्कीको इच्छा र बार्सिलोनाको आवश्यकता पूर्ति हुने कारण पनि ट्रान्सफर सम्भव देखिन्छ ।

यो पनि : एमबाप्पेको रियल म्याड्रिडबाट खेल्ने सपनामा पिएसजी तगारो

Source link