पन्जाबसँगको हारले बेंगलोरको प्लेअफ कठिन

एजेन्सी – इन्डियन प्रिमियर लिग (आइपिएल) २०२२ मा रोयल च्यालेन्जर्स बेंगलोरको प्लेअफ यात्रा कठिन बनेको छ । शुक्रबार राती पन्जाब किंग्ससँग ५४ रनले पराजित भएसँगै बेंगलोरले सहजै प्लेअफमा पुग्ने अवसर गुमाएको छ ।

जितको लागि २ सय १० रनको विशाल विजयी लक्ष्य पछ्याएको बेंगलोरले निर्धारित २० ओभरमा ९ विकेट गुमाउँदै १ सय ५५ रन बनायो । बेंगलोरका ग्लेन म्याक्सवेलले २२ बलमा ३ चौका र १ छक्कासहित सर्वाधिक ३५ रन बनाए ।

विराट कोहली १४ बलमा २ चौका र १ छक्कासहित २०, फाफ डु प्लेसिस १०, राजत पाटिदर २६, महिपाल लोमर ६, दीनेश कार्तिक र हर्षल पटेल ११–११ रनमा आउट भए ।

पन्जाबका कागिसो रबाडाले ४ ओभरमा २१ रन खर्चेर ३ विकेट लिए । ऋषि धवन र राहुल चाहरले २–२ विकेट लिए । हरप्रीत ब्रार र अर्शदीप सिंहको नाममा १–१ विकेट रह्यो ।

त्यसअघि ब्रेबोन स्टेडियम मुम्बईमा टस हारेर ब्याटिङको निम्तो पाएको पन्जाबले निर्धारित २० ओभरमा ९ विकेट गुमाउँँदै २ सय ९ रन बनायो । पन्जाबका जोनी बेयरस्टोले २९ बलमा ४ चौका र ७ छक्कासहित ६६ रनको विष्फोटक सुरुवात गरेका थिए । उनी नै खेलको प्लेअर अफ द म्याच चुनिए ।

लियाम लिभिङस्टोनले ४२ बलमा ५ चौका र ४ छक्कासहित सर्वाधिक ७० रनको योगदान दिए । ओपनर शिखर धवन र बेयरस्टोले पहिलो विकेटका लागि पाँच ओभरमा ६० रन जोड्दै उत्कृष्ट सुरुवात दिलाएका थिए । ग्लेन म्याक्सवेलको बलमा बोल्ड हुनुअघि धवनले १५ बलमा २ चौका र १ छक्कासहित २१ रन बनाए ।

वानिन्दु हसरंगाको बलमा भानुका राजपक्षे १ रनमा हर्षल पटेलबाट क्याच भए । मयंक अग्रवाल १९, जितिश शर्मा ९, हरप्रीत ब्रार र ऋषि धवन ७–७ रनमा आउट भए ।

बेंगलोरका हर्षल पटेलले ४ ओभरमा ३४ रन खर्चेर ४ विकेट लिए । वानिन्दु हसरंगाले ४ ओभरमा १५ रन खर्चेर २ विकेट लिए । ग्लेन म्याक्सवेल र शहबाज अहमदको नाममा १–१ विकेट लिए ।

बेंगलोर १३ खेलमा ७ मा जित र ६ मा हार सहित १४ अंकका साथ चौथो स्थानमा छ । बेंगलोरले अन्तिम खेल शीर्षस्थानको गुजरात टाइटन्ससँग १९ मे मा प्रतिस्पर्धा गर्नेछ । उक्त खेल जितेको खण्डमा १६ अंक हुनेछ । बेंगलोर अन्तिम खेलमा पराजित भएमा प्लेअफ दौडबाट बाहिरिने सम्भावना उच्च देखिन्छ । जितले मात्र पुग्दैन अन्य टोलीको प्रदर्शन र नजितामा बढी निर्भर रहनुपर्ने हुन्छ ।

समान १२ खेल खेलेको गुजरातको १८ अंक र लखनऊ सुपर जायन्ट्सको १६ अंक छ । गुजरात प्लेअफमा पुग्ने पहिलो टोली हो । बेंगलोरको हारले पन्जाब, हैदराबाद र दिल्लीको सम्भावना पनि त्यतिनै बनेको छ । अव पन्जाब, दिल्ली, बेंगलोर र हैदराबाद सबै १६ अंकका साथ प्लेअफमा पुग्ने दौडमा छन् । राजस्थानलाई १८ अंक र लखनऊलाई २० अंकका साथ अन्तिम दुईमा रहँदै प्लेअफ खेल्ने अवसर छ ।

अंक तालिका

गुजरात १२ खेलमा ९ मा जित र ३ मा हारका १८ अंक जोड्दै शीर्ष स्थानमम छ । गुजरात प्लेअफमा पुग्ने पहिलो टोली हो । लखनऊ १२ खेलमा ८ मा जित र ४ मा हार सहित १६ अंकका साथ दोस्रो स्थानमा छ । राजस्थान रोयल्स १२ खेलमा ७ मा जित र ५ मा हार सहित १४ अंकका साथ तेस्रो स्थानमा छ ।

बेंगलोर १३ खेलमा ७ मा जित र ६ मा हार सहित १४ अंकका साथ चौथो स्थानमा छ । दिल्ली १२ खेलमा ६ मा जित र ६ मा हार सहित १२ अंक जोड्दै पाँचौं स्थानमा छ । पन्जाब १२ खेलमा ६ मा जित र ६ मा हार बेहोर्दै १२ अंकका साथ छैटौं सहित स्थानमा छ । हैदराबाद ११ खेलमा ५ मा जित र ६ मा हार सहित सातौं स्थानमा छ । कोलकाता नाइट राइडर्स १२ खेलमा ५ मा जित र ७ खेलमा हार सहित आठौं स्थानमा छ । चेन्नई १२ खेलमा ४ मा जित र ८ मा हार सहित नवौं स्थानमा छ । मुम्बई १२ खेलमा २ मा जित र ९ मा हार सहित पुछारमा छ ।

Source link